Ինչպես առողջ մնալ 30, 40, 50 տարեկանում

Վիտամինների և կենսաբանական ակտիվ հավելումների վրա փող ծախսելու փոխարեն, օրգանիզմի բնական պաշտպանությունը կարելի է բարձրացնել առավել մատչելի և հաճելի միջոցներով: Միայն հիշեք. ամեն ինչ չափի մեջ է լավ:

30 տարեկանից հետո...

Ավելի քիչ շաքար և ալկոհոլ օգտագործել: Արևմուտքում կարծում են, որ 30 տարեկանում կյանքը նոր է սկսվում: Մասամբ դա ճիշտ է: Շատերն, հատկապես, այդ տարիքում են աշխատանքում հասնում ցանկալի հաջողությունների, ընտանիք են կազմում, բնակարան, ավտոմեքենա գնում և այլն: Եվ այս ամենն հասցնելու համար, երբեմն սեփական ուժերը չեն գնահատում: Արդյունքում տնային հանգիստ ընթրիքին փոխարինելու են գալիս պլաստիկե բաժակներով սուրճը, գազավորված հյութերը, փքաբլիթներն ու համբուրգերները, շոկոլադը, որոնց մեջ շատ շաքար ու ճարպ է պարունակվում:

Արյան մեջ գլյուկոզայի կտրուկ բարձրացումը կարող է իմունային համակարգի աշխատանքին  վնասել մոտավորապես 3 ժամով, հաստատում են Միչիգանի բժշկական համալսարանի բժիշկները: Գազավորված ըմպելիքի մեկ չափաբաժինը բավական է, որպեսզի իմունիտետն իջնի 30%-ով: Իմունային համակարգի բջիջները պարզապես կորցնում են օրգանիզմում ինֆեկցիան գտնելու և ոչնչացնելու իրենց ունակությունը:

Իմունիտետի մյուս «թշնամին» ալկոհոլն է, նշում են այդ նույն բժիշկները: 30 տարեկանից հետո աշխատող մարդու մոտ առավելագույնս բարձրանում է, այսպես կոչված,«հանգստյան օրվա ալկոհոլիզմ» ստանալու ռիսկը: Աշխատանքային ծանր հնգօրյակի վերջում ռեստորան ենք գնում թուլանալու, լարվածությունը հանելու, տուն ենք տանում մի քանի շիշ գինի կամ օղի, կամ պարզապես ընկերների հետ ենք խմում ու այն արդեն սովորություն է դառնում: Իսկ չէ որ ալկոհոլի ամեն մի չափաքանակ իջեցնում է օրգանիզմում ինֆեկցիաների դեմ պայքարող բջիջների արտադրման ունակությունը:

Սպիրտային խմիչքների և շաքարի բացասական արդյունքը նվազեցնելու համար, գիտնականները խորհուրդ են տալիս ոչ միայն պակասեցնել դրանք օգտագործումը, այլև ուտել սննդային թելիկներ պարունակող մթերք` խոշոր աղացվածքի ալյուրից պատրաստված հաց և մակարոնեղեն,  վարսակաձավար, բանջարեղեն, որոնք աղիների համար օգտակար աղբյուր են: Մանրէային հավասարակշռության ճիշտ պահպանումը կխանգարի մարսողական համակարգում տարբեր ինֆեկցիաների ներծծմանը:

Ֆիզիկական վարժություններ: Ուժային ծանրաբեռնվածությունը և ուժասպառ անող մարզումները, հնարավոր է, օգնեն ավելորդ կիլոգրամներից ազատվելուն, սակայն իմունիտետն, ընդհակառակը, դրանից թուլանում է: Ինչպես հաստատում են Նյու-Յորքի Լենոքս Հիլլի հիվանդանոցի բժիշկները, իմունային համակարգը հնարավոր է ամրապնդել չափավոր ֆիզիկական ծանրաբեռնվածությունների օգնությամբ, քիչ-քիչ, բայց պարբերաբար: Առողջարարական մարզումների բանաձևը հետևյալն է. շաբաթը երեք անգամ 20 րոպեանոց թեթև վազք, գումարած 15-20 րոպե ուժային մարզումներ:

40 տարեկանից հետո...

Ժամանակ հատկացնել քնին: Ո՞վ չի սիրում երկարատև, հոգնացնող օրվանից հետո «փռվել» հեռուստացույցի առջև կամ կարդալ անկողնու մեջ պառկած: Դե պարզ է, ցանկալի է աշխատանքից հետո հոգնածությունից, կենցաղային խնդիրներից ազատվել և գոնե մի փոքր ուղեղն անջատել: Սակայն, եթե ցանկանում եք օրգանիզմն առույգացնել, ավելի լավ է քնել:

Քունը վերականգնողական գործընթաց է, որն անհրաժեշտ է իմունիտետի նորմալ գործառնության համար, հաստատում են Միչիգանի համալսարանի բժիշկները: Ցերեկային ժամերին կես ժամից մինչև 1 ժամ լրացուցիչ քունը բավական է, որպեսզի իմունային համակարգն էլ ավելի ամրանա:

Եվ գլխավորը, մի պայքարեք ինքներդ ձեր դեմ, եթե զգում եք, որ քնելու անասելի ցանկություն ունեք: Օրգանիզմն այդպիսով «հաղորդում» է, որ իրեն հանգիստ է պետք, իսկ սիրած հաղորդումը դիտելը  կամ գիրք կարդալը կարելի է հետաձգել:

Սովորեք թուլանալ: 40-45 տարեկան հասակը կյանքի ամենասթրեսային ժամանակատահվածն է: Աշխատանքային խնդիրները, մեծացող երեխաների հետ վիճաբանությունները, ՙմիջին տարիքի՚ հոգեբանական պատնեշը մեկը մյուսի վրա են լցվում և, արդյունքում, գտնվում եք մշտական հուզական լարվածության վիճակում: Սթրեսն ուժասպառ է անում ոչ միայն հոգեպես, այլև ֆիզիկապես, իմունային համակարգին ստիպելով խափանումներով աշխատել, դանդաղորեն հակազդելով վիրուսներին ու մանրէներին Դրա համար հարկ է անպայման  հանգստանալուն ժամանակ տրամադրել. յուրաքանչյուր 2-3 ժամը մեկ գոնե 15-20 րոպե: Օրինակ, աշխատավայրում կարելի է վեր կենալ համակարգչի և հեռախոսի մոտից և թեյ խմել, կամ դուրս գալ մաքուր օդ շնչելու, կամ էլ, եթե հնարավոր է, պարզապես թիկնել բազկաթոռին և որոշ ժամանակ աչքերը փակել: Արևմուտքում շատ ընկերություններում վաղուց են հասկացել նման ընդմիջումների անհրաժեշտությունը և հատուկ ռելաքս±±-սենյակներ են պատրաստել իրենց աշխատակիցների համար: Դրանք ոչ մեծ մութ սենյակներ են, հարմարավետ բազկաթոռներով, որտեղ կարելի է ոչ միայն մի փոքր ննջել, այլև թուլանալ:

Սակայն հիշեք. եթե աշխատանքից կտրվում եք ու ուշադրությունը փոխում համացանցի ինչ-որ կայքի վրա կամ մեկ այլ համակարգչով եք տարվում, այդ դեպքում պարզապես ինքներդ ձեզ խաբում եք: Գլխուղեղը շարունակում է աշխատել այդ նույն ինտենսիվությամբ, նույնիսկ, ավելի ուժեղ: Հոգեբանների վկայությամբ, տեխնիկայի առատությունն ու կապի միջոցները հոգեկան աշխարհի վրա ահռելի բացասական ազդեցություն են թողնում ու տառացիորեն ծանրաբեռնում տեղեկատվությամբ, ինչն էլ հրահրում է քրոնիկական սթրես:

50 տարեկանից հետո...

Գաղտնիքը հակաօքսիդանտների մեջ է: Տարիքային այս սահամանագծում  առողջությունն սկսում է թուլանալ. բոլոր հնարավոր հիվանդությունների ռիսկը, սկսած մաշկայինից մինչև սիրտ-անոթային, մի քանի անգամ բարձրանում է:

Այդ ժամանակահատվածում օրգանիզմի բնական պաշտպանությունն ամրապնդելու համար Կալիֆոռնիայի համալսարանի գիտնականները խորհուրդ են տալիս օրվա սննդակարգում ներառել հակաօքսիդանտներով հարուստ մթերք: Ամերիկացի գիտնականների հետազոտության արդյունքների համաձայն, իմունիտետի վրա բարերար ազդեցություն են թողնում, հատկապես, դդմիկը, բրոկոլին և կաղամբը, որոնք, ամե ինչից զատ, պարունակում են նաև հակաուռուցքային նյութեր: Հակաօքսիդանտներով հարուստ են շատ հատապտուղները, մրգերը, նաև սուրճն ու կանաչ թեյը:

Նպատակներ դրեք ու դրանք իրագործեք: Լոս Անջելեսի Կարոլինայի համալսարանի գիտնականների անցկացրած հետազոտությունների արդյունքների համաձայն, այն մարդիկ, ովքեր կյանքի հեռակա պլաններ ունեն, ավելի երկար են ապրում, քան նրանք, ովքեր միայն այսօրվա մասին են մտածում: Ավելին, փորձարկումները ցույց են տվել, որ երբ մարդը մտածում ինչ-որ խոշոր գնումների կամ ճամփորդության մասին և երկար սպասում ցանկությունների կատարմանը, նրա իմունային համակարգն սովորականից ավելի արագ ու լավ է աշխատում: Բացահայտման հեղինակներն իրենք էլ վստահ չեն, թե ինչով է հրահրված այսպիսի կապը, սակայն կարծում են, որ նպատակ դնելն ու դրան հասնելու ցանկությունը մարդուն օգնում են դուրս գալ սթրեսային իրավիճակից:

Մի մոռացեք անձնական կյանքի և սիրո մասին: Շատերը սխալմամբ կարծում են, որ 50 տարեկանից հետո ինտիմ կյանքի մասին արդեն կարելի է մոռանալ: Սակայն գիտնականները նշում են, որ դա այդպես չէ: Երեխաներն արդեն մեծացել են, աշխատաքանքային կարիերային հասել եք, ժամանակն է ուշադրություն դարձնել անձնական կյանքին: Ինչպես հաստատում են ամերիկացի գիտնականները, շաբաթական 1-2 անգամ սեռական շփումները 30%-ով բարձրացնում են հատուկ հակամարմինների արտադրությունը, պաշտպանելով մրսածության տարատեսակ  վիրուսներից:

Հարցեր, պատասխաններ, մեկնաբանություններ